ბათუმის საერთაშორისო ტურიზმის ფორუმი

საქართველოს ზღვისპირა ქალაქი ბათუმი, რომელიც გამორჩეულია, როგორც სწრაფად მზარდი ტურისტული და ბიზნეს მიმართულება, 2023 წლის 28 სექტემბერს პირველად უმასპინძლებს „ბათუმის საერთაშორისო ტურიზმის ფორუმს“.

აღნიშნული ღონისძიების მთავარი მიზანია, შექმნას პლათფორმა, რომელზეც შესაძლებელი იქნება ტურიზმის სფეროს საერთაშორისო ლიდერების და პროფესიონალების ჩართულობით გაიმართოს დისკუსიები, ერთის მხვრივ, ტურიზმის მდგრადი განვითარების პრიორიტეტებსა და არსებულ გამოწვევებზე, და მეორეს მხვრივ, შემუშავდეს ახალი ხედვები ტურიზმის სფეროში ინვესტიციების, ახალი ტექნოლოგიების, ინოვაციებისა თუ გარემოს დაცვის მიმართულებით.

ფორუმის ფარგლებში მსოფლიოს სხვადასხვა ქვეყნებიდან ერთიანდებიან ტურიზმის სფეროს ექსპერტები, ტურიზმის სექტორის წარმომადგენლები, ინდუსტრიის წამყვანი სპეციალისტები და სამთავრობო უწყებების წარმომადგენლები. აღნიშნული ღონისძიება იძლევა უნიკალურ შესაძლებლობას ტურიზმის სფეროში ქვეყნებს შორის თანამშრომლობისა და პარტნიორობის გასამყარებლად.

„ბათუმის საერთაშორისო ტურიზმის ფორუმი“ არის კარგი შესაძლებლობა, რათა მოხდეს მსჯელობა ტურიზმის სფეროში არსებულ სხვადასხვა საკითხზე და გამოწვევებზე, რომლებიც მნიშვნელოვანია მდგრადი ტურიზმის განვითარებისთვის. ფორუმი ითვალისწინებს სხვადასხვა პანელურ სესიას, სადაც მსოფლიოს სხვადასხვა ქვეყნიდან მოწვეული მონაწილეები ჩაერთვებიან დისკუსიებში, ისაუბრებენ მოგზაურობის თანამედროვე ტენდენციებზე, მოახდენენ ინფორმაციის გაცვლას და ცოდნის გაზიარებას ისეთ საკითხებზე, როგორიც არის, მაგალითად, ინვესტიციები ტურიზმის სექტორში, მცირე და საშუალო მეწარმეობის მხარდაჭერა, მდგრადი ტურიზმის განვითარების პროექტები.

ამავდროულად, მოწვეულ დელეგატებს შესაძლებლობა ექნებათ გასვლითი ტურების ფარგლებში გაეცნონ რეგიონის ტურისტულ პოტენციალს და ისიამოვნონ ქართული სტუმართმასპინძლობით.